ციფრული მმართველობის სააგენტოს პროდუქტებსა და სერვისებს ყაზახეთის ქალაქ ყარაგანდას ეროვნული კვლევითი უნივერსიტეტის სამეცნიერო-კვლევითი ჯგუფის წარმომადგენლები გაეცნენ. მხარეებმა მიმოიხილეს ყაზახეთისა და საქართველოს ციფრული სამართალწარმოების სექტორი. კერძოდ კი, სისხლის სამართლის საქმეების მიმართულებით მოქმედი ციფრული მექანიზმები. სტუმრების განსაკუთრებული დაინტერესება გამოიწვია სააგენტოს მიერ შექმნილმა სისხლის სამართლის საქმისწარმოების მართვის ელექტრონულმა სისტემამ, რომელიც გამომძიებლებსა და პროკურორებს საშუალებას აძლევს სისხლის სამართლის საქმეებზე საგამოძიებო და საპროცესო მოქმედებები ელექტრონულად განახორციელონ. პროგრამა ხელს უწყობს საპროკურორო საქმიანობისა და გამოძიების საპროცესო ხელმძღვანელობის ეფექტიან უზრუნველყოფას. სამუშაო შეხვედრაზე ასევე განიხილეს ყაზახეთის სახელმწიფო გრანტით შექმნილი ხელოვნური ინტელექტის სისტემის ორი მაგალითი, რომელთა მეშვეობითაც ხორციელდება სასამართლო გადაწყვეტილებებისა და საჯარო მმართველობის პროცესში შექმნილი დოკუმენტების ანალიზი. სისტემა ხელს უწყობს სამართალწარმოების პროცესის ეფექტიანობას მოსამართლეების, პროკურორების, გამომძიებლების და ადვოკატების დროითი რესურსის დაზოგვითა და ადამიანური შეცდომების შემცირების გზით. მხარეები თანამშრომლობის გაღრმავებისა და საინტერესო პრაქტიკების გაზიარების მიზნით სამუშაო შეხვედრების გაგრძელებაზე შეთანხმდნენ.

ციფრული მმართველობის სააგენტოს წარმომადგენელმა ხელოვნურიინტელექტისა დაადამიანის უფლებების, დემოკრატიისა დასამართლის უზენაესობის (CETS 225) ევროპის საბჭოს ჩარჩო კონვენციის შესახებ სინგაპურში გამართულ საერთაშორისო კონფერენციაზე ისაუბრა. ციფრული მმართველობის სააგენტოს ციფრული მმართველობისა და კიბერუსაფრთხოების სტრატეგიული დაგეგმვისა და ანალიტიკის სამსახურის უფროსი დიმიტრი გუგუნავა ამავდროულად ევროპის საბჭოს ხელოვნური ინტელექტის კომიტეტის აღმასრულებელი ბიუროს წევრია და შესაბამისად, ხელოვნური ინტელექტის შესახებ ჩარჩო კონვენციის შექმნის პროცესის მონაწილეა.დიმიტრი გუგუნავამ ისაუბრა იმ პრაქტიკულ მაგალითებზე, თუ როგორ შეცვალა ხელოვნური ინტელექტის სისტემებმა ადამიანის ყოველდღიურობა; რა ტიპის საფრთხეებს უქმნის შეცვლილი რეალობა ადამიანის უფლებებს, დემოკრატიასა და სამართლის უზენაესობას. ხაზი გაუსვა ევროპის საბჭოს სტრატეგიას აღნიშნულ საფრთხეებთან გამკლავების პროცესში. ევროპის საბჭოს ჩარჩო კონვენცია პირველი საერთაშორისო და სავალდებულო დოკუმენტია, რომელიც მიზნად ისახავს ხელოვნური ინტელექტის სისტემების გამოყენებასა და ადამიანის უფლებების დაცვას შორის ბალანსის უზრუნველყოფას. კონვენციას საქართველოს იუსტიციის მინისტრმა 2024 წლის 5 სექტემბერს ვილნიუსში გამართულ ევროსაბჭოს იუსტიციის მინისტრების კონფერენციაზე მოაწერა ხელი.,,ციფრული ტექნოლოგიების გავლენის შესახებ“ (Empowering Through Digital Technologies) საერთაშორისო კონფერენცია სინგაპურის ეროვნული უნივერსიტეტის საერთაშორისო სამართლის ცენტრის ორგანიზებით გაიმართა და მასში მონაწილეობას 20-ზე მეტი მოწვეული მომხსენებელი, მკვლევარი და პრაქტიკოსი სპეციალისტი მონაწილეობდა. კონფერენციის ძირითადი თემები იყო ციფრულ ტექნოლოგიების სამართლებრივი რეგულაციები, ინკლუზიურობა ციფრულ კონტექსტში და ციფრული ტექნოლოგიების მეშვეობით გაძლიერების პერსპექტივები.

ციფრული მმართველობის სააგენტოს საქმიანობასა და სერვისებს ბუქარესტის ინფორმატიკის კვლევისა და განვითარების ეროვნული ინსტიტუტის წარმომადგენლები გაეცნენ. შეხვედრაზე საქართველოსა და რუმინეთის ციფრული მმართველობის სისტემები და ინსტიტუციური ფუნქციები განიხილეს. სტუმრებმა მიიღეს ინფორმაცია ციფრული მმართველობის სააგენტოს მანდატზე, საქმიანობის ძირითად მიმართულებებსა და პროდუქტებზე, მათ შორის, ელექტრონული სერვისების ერთიან პორტალზე my.gov.ge. ასევე, იმ პროექტებისა და პროგრამული უზრუნველყოფის სერვისების შესახებ, რომელსაც სააგენტო ახორციელებს. ციფრული მმართველობის სააგენტოს თავმჯდომარის მოადგილე, ლევან გელაშვილი და ბუქარესტის ინფორმატიკის კვლევისა და განვითარების ეროვნული ინსტიტუტის (ICI) გენერალურ დირექტორი შეთანხმდნენ ორგანიზაციული თანამშრომლობის შესახებ მემორანდუმის გაფორმებაზე, რომლის ფარგლებში ერთობლივი პროექტების დაგეგმვა და განხორციელება დაიწყება. რუმინულმა მხარემ ციფრული მმართველობის სააგენტო 2026 წელს ბუქარესტში დაგეგმილ გლობალურ ციფრულ სამიტზე მიიწვია.