ციფრული მმართველობის სააგენტოს თავმჯდომარემ, სანდრო ცირეკიძემ, გრიგოლ რობაქიძის სახელობის უნივერსიტეტის სტუდენტებთან შეხვედრა გამართა და ახალგაზრდებს სააგენტოს საქმიანობა, ინოვაციები და სამომავლო შესაძლებლობები გააცნო.შეხვედრაზე განიხილეს სახელმწიფო ელექტრონული სერვისების განვითარების პროცესი და საჯარო სექტორში თანამედროვე ტექნოლოგიების დანერგვის მიმართულებით სააგენტოს საქმიანობის როლი და მნიშვნელობა. ერთ-ერთი მთავარი თემა იყო ხელოვნური ინტელექტის ინტეგრაცია სახელმწიფო სერვისებში. საუბარი შეეხო მის შესაძლებლობებს მოქალაქეებისთვის ინფორმაციის მიწოდების, საჭირო სერვისების მოძიებისა და მომსახურების პროცესის გამარტივების მიმართულებით.სტუდენტებმა მიიღეს ინფორმაცია განხორციელებული და მიმდინარე ციფრული პროექტების შესახებ. ერთ-ერთი მნიშვნელოვანი საკითხი იყო ელექტრონული სერვისების ერთიანი პორტალი - my.gov.ge, რომელიც მოქალაქეებს აძლევს შესაძლებლობას, მსოფლიოს ნებისმიერი წერტილიდან ელექტრონულად მიიღოს 400-ზე მეტი სახელმწიფო სერვისი. სტუდენტები ასევე გაეცნენ მონაცემთა გაცვლის ერთიან სისტემას (G3), რომელიც სახელმწიფო უწყებებს შორის მონაცემთა უსაფრთხო და ეფექტიან გაცვლას უზრუნველყოფს და სახელმწიფო ციფრული ინფრასტრუქტურის მდგრადობისა და საიმედოობის გაძლიერებას უწყობს ხელს.შეხვედრა კითხვა-პასუხის ფორმატში წარიმართა. დისკუსიის ფარგლებში იმსჯელეს პროფესიული გამოცდილების მიღების, პრაქტიკული ცოდნის გაღრმავებისა და საჯარო სექტორის ციფრული ტრანსფორმაციის პროცესში ახალგაზრდების ჩართულობის მნიშვნელობაზე. სტუდენტების ინტერესი გამოიწვია სააგენტოში სტაჟირების პროგრამამ და დასაქმების შესაძლებლობებმა.

საჯარო სერვისებში ხელოვნური ინტელექტის პასუხისმგებლიან გამოყენებაზე, ინსტიტუციური შესაძლებლობების განვითარებასა და საერთაშორისო თანამშრომლობაზე იმსჯელეს სტამბოლში გამართულ რეგიონთაშორის კონფერენციაზე - „ხელოვნური ინტელექტის მმართველობა პრაქტიკაში“.ქვეყნების გამოცდილებისადმი მიძღვნილ პანელზე ციფრული მმართველობის სააგენტოს ციფრული მმართველობისა და კიბერუსაფრთხოების სტრატეგიული დაგეგმვისა და ანალიტიკური სამსახურის უფროსმა, დიმიტრი გუგუნავამ, წარადგინა მოხსენება - „საქართველო: პასუხისმგებლიანი ხელოვნური ინტელექტი საჯარო სერვისებში“. მან ისაუბრა საქართველოს საერთაშორისო ვალდებულებებზე, ხელოვნური ინტელექტის ეროვნული სტრატეგიის შემუშავების პროცესსა და UNESCO-ს მიერ განხორციელებულ ხელოვნური ინტელექტის მზაობის შეფასებაზე.საქართველოს გამოცდილების წარდგენისას სააგენტოს წარმომადგენელმა ასევე მიმოიხილა იუსტიციის სახლში დაგეგმილი, ხელოვნურ ინტელექტზე დაფუძნებული საკონსულტაციო და თვითმომსახურების ინიციატივები. ყურადღება გამახვილდა პერსონალური მონაცემების დაცვაზე, ხელოვნური ინტელექტის მიერ მოქალაქეებისთვის მიწოდებული ინფორმაციის სიზუსტესა და სანდოობაზე, ასევე მომსახურების პროცესში ადამიანის როლისა და საჭიროებების მნიშვნელობაზე.ღონისძიებაში საქართველოს იუსტიციის სამინისტროს სსიპ ციფრული მმართველობის სააგენტოსთან ერთად, იუსტიციის სახლისა და სახელმწიფო სერვისების განვითარების სააგენტოს წარმომადგენლებიც მონაწილეობდნენ.

ცენტრალური აზიის კიბერუსაფრთხოების მე-4 სამიტზე რეგიონში კიბერუსაფრთხოების მიმართულებით არსებულ გამოწვევებზე, ტექნოლოგიური განვითარების თანმდევ რისკებსა და მათი დაძლევის გზებზე იმსჯელეს.პლენარულ სესიაზე, რომელიც რეგიონის სწრაფი ტრანსფორმაციის პირობებში კიბერუსაფრთხოების გამოწვევებს დაეთმო, ციფრული მმართველობის სააგენტოს თავმჯდომარის მოადგილემ, ნინო გოზალიშვილმა, საქართველოს გამოცდილებასა და უწყებათაშორისი თანამშრომლობის მნიშვნელობაზე ისაუბრა. მან ყურადღება გაამახვილა უწყებებს შორის გაფორმებული მემორანდუმის როლზე და ხაზი გაუსვა თანამშრომლობის შემდგომი გაღრმავების აუცილებლობას.სამიტის ფარგლებში გამართულ პანელურ დისკუსიებსა და სამუშაო შეხვედრებზე განიხილეს კიბერუსაფრთხოების უზრუნველყოფაში ხელოვნური ინტელექტის როლი, კრიტიკული ინფრასტრუქტურისა და აქტივების დაცვა, საბანკო და საფინანსო სექტორის წინაშე არსებული საფრთხეები, IT/OT უსაფრთხოების მნიშვნელობა და კიბერუსაფრთხოების სფეროში კვალიფიციური კადრების განვითარების საჭიროება.უზბეკეთის რესპუბლიკის დედაქალაქ ტაშკენტში გამართულ ღონისძიებაში საჯარო სექტორის წარმომადგენლები, საერთაშორისო და ადგილობრივ ორგანიზაციები, კიბერუსაფრთხოების ექსპერტები და აკადემიური წრეების წარმომადგენლები მონაწილეობდნენ.ციფრული მმართველობის სააგენტოსთვის საერთაშორისო სამიტებში მონაწილეობა მნიშვნელოვანია კიბერუსაფრთხოების სფეროში საქართველოს გამოცდილების გაზიარების, საერთაშორისო პარტნიორებთან თანამშრომლობის გაღრმავებისა და თანამედროვე გამოწვევებზე ეფექტიანი მიდგომების განვითარების თვალსაზრისით.